ع حد علمي ... !!
ع حد علمي اشتقتلك موت
صعب تقول للشوق اسكوت
طالع ع بالي كسر السفر
جمّع حروفي ... خبّر القمر
شو حلو تحلّي عراويك
تتكشّفي بالليل … لاغطيك
شو حلو بعدك تضحكي
تبرمي ع جنبك تتمحكي
ابكي ع صدرك هجع
طفل زغير من الوجع
رجع يعيد نفس الحكي
من الالف ألف محبة
و من الباء حبة و حبة
و يجي ع اسمك يغلط فيه
تضحك شفافك تضميه
تطلع منه جملة ملبكة
من قوة الضمة … مفككة
تبكي زرار المريولة
يقلك لسين الطفولة
ع حد علمي اشتقتلك موت
.....
ع حد علمي جمعت الغزل
حيكوا شراعي عيدان الامل
و لو جيت لعندك بنص الليل
ما تفزعي ما تخافي هاد أنا
جارف هواي متل السيل
تعبان متل شهاب السنا
قرّبي صدرك يمسح قهري
شايل دموعي ع ضهري
و ان شفتيني بكيتْ لا تزعلي
لا تفتحي مواضيع و تسألي
عم صرّف بعد السنين .. ألم
يمكن وحشة و يمكن … ندم
بس الأكيد … متلك مشتاق
محروم حكي … و اشواق
بهاد الزمن انمنع الكلام
و صار الخطر جوا السلام
كيف بدي أقول للشوق اسكوت
و ع حد علمي اشتقتلك … موت
......
طول عمري .. أنا و صغير
اسأل حالي سؤال زغير
شو يعني كلمة بشاعة
شو هي الفرقة و وجاعها
ما راح بطل إني حبك
راح ازرع روحي بدربك
و لو بيوم حلمت ِ فيني
و صرت تدوري علي ويني
راح يجاوبك حرف الدفاتر
من قلب السواد و المحابر
راح يوشوشك بأخر سراره
راح يقلك أحلى اخباره
سافر الخريف من حدنا
بقينا نحنا بهل الليل وحدنا
راح نيم أحلام الناس
حتى افضى صحي حلمي
ارجع وعي هل الاحساس
قصيدة اسمها ع حد علمي
و ع حد علمي اشتقتلك موت
صعب تقول للشوق اسكوت
......
#بقلم_المحامي_أحمد_يمان_قباني
ليست هناك تعليقات:
إرسال تعليق