محكية ... صباح الخير ..!!
صباح برد مجنون
عم يفكر بأول الكلام
صباح هديك العيون
كمشة حروف و أنغام
عندك نبي ؟ صلي عليه
خدها فاق اسم الله عليه
ليش نهاري حلي
صباحي زاد و غلي
صباح الخير غرق
مسك بلا عرق
غنية ع شفاف
عطر ورد شفاف
أول صحوة العنبر
اول دوبان السكر
شو عندي اقلك
اضمك ما أملك
و اذا الزهر فاق
بألوان و اشواق
مجمعة مطبقة بشفة
و لا ألف ضمة و لا ألف لفة
غربل نسيمك عبر
هز قلبي
حمدت ربي
ضاع دربي
تعب هدبي
طفل غضب
زعل و عتب
بسبب و إلا بلا بسبب
عم يرقص متل الغجر
صباح الخير كمنجة عزف
و بوسة رضت تروح خطف
صباح جواز الحمام
هنادي ولا ئطف
خافوا لما طاروا قوام
تركولي الصباح بظرف
صباح الخير ضاعوا الكلمات
محتارة عيونك بهل السلامات
ضحكت الغندرة
ضحكة مشفترة
قالولي عيونها … هات
صباح الورد الدبلان
لما بصحى من زمان
بيوضي عيونه بنور
تضحكلي شفافه بسرور
غمرة و حدا غمرة
بقيانين من السهرة
صباحها رجعلي الدين
حمرة شفة و خدين
صباحك و الرحيق
لما الحسن بيفيق
بتناؤ من حد الكون
طايش أرعن مجنون
مخنوق الصوت
مشتاقلي مووت
رماني بعطره الحنون
يا الله كيف الاحلام
بتصحى لما كنا نام
يا بو الورد و زراره
يا بو السحر و اسراره
صباحك و الحضن الحاني
يا ضماتو و المعاني
قام بسرعة صحاني
بسمة ع شفة و غناني
ضمني شمني غناني
خجل لما دفاني
حفر بضوافره طريق
تمسك فيني متل غريق
شراع و ضفة لاقاني
صباحك عن جديد
يا أول … التغريد
صباح الخير يا روحي
صباح الخير يا عمري
#بقلم_المحامي_أحمد_يمان_قباني
ليست هناك تعليقات:
إرسال تعليق