الكلمة لابسه كام قناع
ساعات بتبث الوفا
وساعات بتهدينا الخداع
وساعات بتعطينا الأمل
وساعات بتاخدنا للضياع
كلمة بتدفي القلوب
وكلمه تدخلنا في صراع
وهمسه صافيه ساعة رضا
تشفي كل الأوجاع
وكلمه حابسها السكات
جواها دمعة في لحظة وداع
هي كلمة في الهوا
مغموسه بسم الأفاعي
على سن رمح اسمه اللسان
تفرد في القلب كام شراع
والريح تاخدها جوه الوريد
ترسم في الجسد أوجاع
وكلمه لينة رقيقة
على شكل زهرة فى البستان
تتمنى تسمع ألف كلمه من اللسان
وكأنها نغمه في غنوه
على نغمة العود و الكمان
تزف للقلب السعاده
يطرح على الشطوط حنان
والنبض يرقص من السرور
ويحس قلبك بالأمان
ياريت ياكلمة ماتخرجي
قبل ما يحسها اللسان
(((أسامه جديانه)))
ليست هناك تعليقات:
إرسال تعليق