بقلم د/ السيد عبد الغفار
جمهورية مصر العربية
بعنوان :
( رسالة لكل فتاة مقبلة على الزواج )
# مش لازم تشترطى على عريسك أن فرحك يكون فى قاعة ب 50 ألف جنيه أو حتى ب 10 آلاف جنيه من أجل خاطر الناس اللى هاتيجى تتكلم ، وتتريق عليكى ، وعلى عريسك ، وعلى ديى ودا ، وتاكل وتشرب ، وبعدها يمشوا .....
# لما تتجوزى مش ضرورى تفتحى دولابك لحد ، ويشوف ملابسك الخاصة بك وبعريسك ، هذا لا يجوز ابدا لأن دى خصوصياتكم ....
* أهلك جايين يباركولك يا مرحبا بيهم ، بس هما مش داخلين معرض موبيليا ، وجايين يعاينوا ملابسكم الخاصة بكم كمان .......
# بنت خالك وبنت عمتك جالها شبكه بكذا ألف جنيه ، وأنتى تقولى أنا مش أقل منهم ...
( هذا مفهوم وفكر خاطئ ) البساطة واليسر مفيش أحسن منهم فى كل حاجة وبالذات فى الجواز ....
* أنتى هتتجوزى راجل، مش هتتجوزى الشبكة ، كفاية عليكى انه يراعى ربنا فيكى وتعيشى معاه فى سعادة وأمان وراحة بال .....
* يا ترى لما تكونى مخنوقة ، الشبكة هتطبطب عليكى ؟؟؟؟ !!!! ....
* اكيد طبعا مش هتقعدى تتكلمى مع الغويشة الدهب ولا أكيد طبعا هاتتكلمى مع الاسورة الدهب ....
# مش لازم تجيبى 15 بيجامة قطيفة و 24 مشجرة و 150 عباية وتخربى بيت أبوكى قبل ما تخرجى منه علشان تتجوزى .......
* أنتى هاتتجوزى ورايحة بيت جوزك ، وبيت أبوكى اللى خربتيه مش بنك الكساء ، وهدومك دى مش جاية تبرع ، دى جاية بتعب أبوكى وحرمان أسرة كاملة علشان تتجوزى وتتفشخرى قدام الكل بعدد البيجامات وغيرها ......
* ياريت تجيبى اللبس اللي تحبيه و يريحك حتى لو بجامة واحدة ومش لازم تبقى زى أى حد رافع مناخيره لفوق ورحم الله امرءا عرف قدر نفسه .. قال تعالى : ( الراحمون يرحمهم الرحمن )
# مش لازم تشترطى على عريسك يجيبلك أوضة نوم من أخشاب السافانا الموجودة فى الغابات الاستوائية العتيقة المطليه بماء الذهب ...
* ياريت ترضى بسرير عادى بس تنامى و أنتى مرتاحة نفسيا و مش معيطة كل يوم لأن عريسك اتحبس بسبب ديون متطلباتك التى فاقت طاقته ....
# مش لازم تشترطى على عريسك يكون عنده شقة تمنها مليون جنيه وتكون ألف متر وتكون عدد :
5 غرف ، 7 رسيبشن ، 5 حمامات ، 4 مطابخ ، 16 بلكونة ... ( خذوهم فقراء يغنيكم الله ) ....
* أى مكان يجمعك باللى اخترتيه هتشوفيه جنة باذن الله وهاتعيشوا سعداء مرتاحين البال ....
# الناس بعد الفرح هتروح بيوتها وأنتى وعريسك اللى هتكملوا مع بعض ودى بداية حياتكم ....
*اختارى شريك حياتك اللى هترتاحى معاه ، عشان دى حياتك أنتى وبس ، وياريت من غير مقارنات ببنت فلان وبنت علان ......
* لأن لما تتخانقى مع عريسك ، لا الدهب و لا طقم الكاسات ولا الميكروويف اللي هيرجعوكم لبعض ، حبكم ، واحترامكم ، و تفاهمكم ، وتقديركم لبعض هو المهم فى حياتكم ...
# ياريت بلاش مقارنات أرجوكى ، وسيبى الناس تجيب اللى على قد ظروفها و اللى يريحها ، بلاش تدخلات فى حياة الناس الله يفرح قلبك و يهديكى متحمليش أبوكى وعريسك فوق طاقتهم كفاية اللى هما فيه ......
ليست هناك تعليقات:
إرسال تعليق