قصيدة رثاء لجبرتي بورسعيد
وحامل مشعل المقاومة الشعبية
عم/كامل عيد
*************************
جبرتي بورسعيد
*************************
من صغر سني ياناس
وانا بعشق اللمة
والصحابه والضامة
بعشق عيون الولد
بعشق تراب البلد
متحني بالحنه
ياعم كامل عيد
علمتنا بإخلاص
نحب كل الناس
علمتني الوطنية
وانا لسه شبل صغير
تلميذ في راس البر
واول درس ياعمي
وانا لسه بتهجى
واعرف حروف الجر
(انذار..
انذار يااستعمار٠٠
ياعصبة الاشرار)
ووعيت ياعمي الدرس
وفهمت يعني ايه تعني
كلمة ولاد صهيون
وبقى شعاري ياعمي
ليكونوا هما لكون
ياعم كامل عيد
ياشاعر الوطنية
منك أنا ممنون
منك أنا ممنون
*************************
(البحر دم دم دم
والسما نار نار نار
وهنمشي هنمشي هنمشي
لنهاية المشوار)
ايوه ياعمي دي كلماتك
كانت ثورة مش اغنية
رددها الشعب بقوة
من اسوان للاسماعلية
وحلفنا لنعد العدة
وتقدمنا للجهادية
بس عشان نحمي اولادنا
لازم تهجير م الصبحية
لازم تهجير م الصبحية
*************************
اااااه وهاجرنا
واتغربنا صحيح وبعدنا
غصب عنا مكنش بايدنا
اتحيرنا يومها وقولنا
الأيام على فين هتاخدنا؟!
واهي خدتنا واتقسمنا
بين دمياط وبنها وطهطا
شوفنا الويل في الغربة صحيح
رب البيت ع الجبهة يحارب
واحنا نشوفه بالتصريح
كانت فترة صعبه علينا
بس قرارنا كان في ايدينا
حتى الدمع فى عينا اتحجر
قولنا دى نكسة
يادوب مش اكتر
لازم نوصل ليلنا نهار
لحد الغاصب ما يموت
او يرحل
فترة صمت طويله ياعمي
حتى الغنا بطلنا نغني
حتى الغنا بطلنا نغني
*************************
وكانت حرب الاستنزاف
ابنك عمره يامصر ما خاف
عدى النكسه وركب الصعب
وكل العالم طل. شاف
بسم الله زلزلت الأرض
وبالتكبير القلب ما خاف
وعرف العالم أن الصمت
كان تجهيز لأداة الحرب
رحلة طويلة ياعمى صحيح
وقطعناها
حتى بحور الخوف والصمت
وعبرناها
ياعم كامل عيد
ياجبرتي بورسعيد
من بيان إلى الشيطان
لام الفنارة والكنال
تاريخ لشعب عاش وناضل
وانكتب له الانتصار
ياعم كامل عيد
ياشاعر بورسعيد
منك أنا ممنون
منك أنا ممنون
*************************
شعر/محمد توفيق
مصر----. بورسعيد
ليست هناك تعليقات:
إرسال تعليق